Ingvar Ómarsson keppir 20. og 27. maí.

Ingvar Ómarsson, Breiðabliki, tekur þátt í UCI World Cup í fjallahjólreiðum í Albstadt í Þýskalandi sunnudaginn 20. maí. Hann keppir einnig á öðru móti í sömu mótaröð 27. maí í Nove Mesto, Tékklandi. Ljóst er að Ingvar keppir við þá allra bestu í greininni, en 147 keppendur eru skráðir til leiks í elite-flokki karla. Ingvar er þó vel undirbúinn og í góðu formi eftir stífar æfingar í Danmörku í vetur auk þess sem hann fór nýlega í vikulanga æfingaferð til Spánar til að hámarka formið fyrir þessi tvö mót.

Keppnin hefst klukkan 12:35 að íslenskum tíma og hægt verður að horfa á hana í beinni útsendingu á redbull.tv.

HRÍ óskar Ingvari góðs gengis!